المقارنة ليست اختيارية.. أنت غداً أمام محاكمة من نوع مختلف.. كل شىء يدل على أننا فراعنة.. حاكمنا «مبارك» فوقف العالم على رجل واحدة يتعجب من جبروت المصريين.. غداً نحاكم «العياط»، لكن الملايين تريد أن تتفرج هذه المرة.. «كيرى» جاء ليس لإجراء مباحثات فحسب، ولكن ليعيش لحظة نادرة.. إليكم السيناريو: (1) الرئيس: إيه الأخبار؟.. السيسى: اطمن يا فندم.. الببلاوى: عملنا غرفة عمليات.. وزير الداخلية: فيه 20 ألف جندى لتأمين المحاكمة.. السيسى: يعنى أكتر من الإخوان.. هاهاها.. الببلاوى: اختيار معهد الأمناء عبقرى.. الرئيس: يطلع من المحكمة ع الزنزانة.. السيسى: أهو كده ونخلص!.. الببلاوى: لا طيارة ولا توك توك.. الوزير: يمكن ده اللى مضايقهم شويه؟.. الرئيس: قد بعضها بقى.. السيسى: يعنى لو فى الأكاديمية كانوا ارتاحوا؟.. الوزير: أنا قلت اللى هيقتحم المحاكمة «هالك».. الببلاوى: ما كانش فيه مبرر لزيارة «كيرى».. الرئيس: ليه لأ؟.. أهلاً وسهلاً(!) (2) المرشد: أخيراً، مرسى فهم.. الشاطر: دفاع مرسى عن نفسه إقرار برفض «الانقلاب».. البلتاجى: الدفاع يبقى ييجى بعدين.. العريان: المحكمة هتعين له دفاع، أنا دارس حقوق.. أبوالعلا: أنا عاوز تليفزيون فى أوضتى.. المرشد: هاشوف وأقولك.. الشاطر: تابع المحاكمة فى الكانتين.. البلتاجى: لازم نشتت الأمن أثناء المحاكمة.. العريان: بلاش اسمعوا كلامى.. أبوالعلا: إحنا كده هانئذى الضباط.. الشاطر: دول مساجين زينا.. المرشد: تشتيت الأمن هيكون فى المحافظات.. البلتاجى: خدوا بالكوا كلامنا كله «متسجل».. أبوالعلا: آه ما أنت تخصص مخابرات (!) (3) أوباما: يعنى «السيسى» نفذ تهديداته؟.. كيرى: هاروح أقابله وأفهم منه.. بايدن: التوقيت ده هيُفهم على أنه دعم للإخوان.. كيرى: إحنا بنتعامل مع دولة.. باترسون: المصريين بقوا أكثر حساسية تجاهنا.. أوباما: بس ما تجبش سيرة «مرسى».. كيرى: لأ، مباحثات ثنائية، وكلام من ده.. باترسون: الشعب المصرى اتغير، هيفهمها بسرعة.. بايدن: خسائرنا كتير فى الشرق الأوسط.. أوباما: زى إيه؟.. بايدن: هتعملوا عقوبات على إيران، وخسرتوا مصر؟.. كيرى: نقول إحنا مع اختيارات الشعوب.. باترسون: لازم نغير طريقة اللعب، «بوتين» يستعد لزيارة القاهرة (!) (4) الخضيرى: لازم «مرسى» يعمل توكيل لمحامٍ.. بشر: التوكيل اعتراف بسقوط الشرعية.. دراج: على الأقل الجلسة الأولى يقول أنا الشرعى.. الخضيرى: الشرعية سقطت يا جدعان، خلونا عمليين.. علاء أبوالنصر: الشرعية لم تسقط يا مولانا.. دراج: مش عاوزين نختلف.. العوا: أنا أقود هيئة الدفاع.. بشر: ماعندناش تعليمات بتشكيل هيئة.. دراج: همه يحاكمونا وإحنا نحاكمهم.. الخضيرى: وبعدين؟.. أبوالنصر: عجبتنى المحاكمات الرمزية للسيسى.. بشر: مرسى يكمل عليه بكرة.. العوا: مرسى هينيلها!.. بشر: تفتكر؟.. العوا: ترشيحه أصلاً كان غلط (!) (5) (ناس فى المترو) صوت1: طول الوقت بقارن بين «مبارك» و«العياط».. صوت 2: إحنا شعب جبار، خلعنا رئيسين فى سنتين.. صوت 3: طريقة الخلع واحدة، والمحاكمة تختلف.. صوت1: مبارك حافظ على سمعته كرئيس سابق.. صوت 2: عندك حق مرسى «قرداتى».. صوت 3: سمعت إنه مش هيوكل محامى.. (مداخلة) أصله كان محامى فى ناسا.. (يضحكون).. صوت 4: سبحان الله مبارك عاش علشان يتفرج.. صوت 1: كلنا هنتفرج.. صوت 4: شكلكم فلول!.. صوت 2: لأ بتوع تمرد، بس عرفنا الفرق.. صوت 3: فعلاً واحد تنحى، والتانى يا يحكمك يا يقتلك (!)