تصدرت الفنانة هنادي مهنا مؤشرات بحث جوجل خلال الساعات الماضية، وذلك بعدما حلت ضيفة على برنامج "كلمة أخيرة"، مع الإعلامية لميس الحديدي، أمس الثلاثاء، على فضائية "on".
 
وتحدثت هنادي مهنا خلال اللقاء عن حياتها الخاصة وزوجها الفنان أحمد خالد صالح، وأعمالها الفنية.
  وإليك أبرز تصريحات هنادي مهنا في "كلمة أخيرة".. كنت في إسبانيا خلال فترة الجامعة بتحرك بشكل كبير وكنت رشيقة لما جيت مصر كان فيه دلع كتير أوي، محشي وحمام ومسقعة ودي حاجات مينفعش تتساب وماتتكلش.
 أنا كنت رفيعة وتخنت أنا عملت كل أنواع الرياضة والدايت لكن في الأخر لجأت لطبيب علشان يساعدنى أنا أساسا رجعت لشكلى الطبيعى ورجعت ألبس ملابسى القديمة.
دلوقتى باخد بالى من أكلى وبعمل رياضة طبعا والتمثيل مالوش علاقة بالشكل خالص لكن له علاقة بالروح.
كنت بدرس في أسبانيا في مجال هندسة الصوت بمجال الموسيقى لأني كنت بحب المزيكا أوي وكان حلمي إني أغني قبل التمثيل واكتسبت ده من الجينات من والدي، ولما جيت مصر اشتغلت مدرسة ودرست كذا حاجة وكنت فاتحة شركة مع بابا وأنا بحب اشتغل من صغري حتى في الصيف من صغري ومش بحب أقعد في البيت.
لما اشتغلت ممثلة مكنتش مستوعبة طبيعة الشغلانة وأن الشغل موسمي ممكن يبقى مكثف شهرين متتالين ثم شهرين أخرين قاعدين في البيت مش بنعمل حاجة ودي كانت حاجة بالنسبة لي فيها إحساس غريب وكنت بقول فيه حاجة غلط لأني متعودة على الشغل اليومي وأني أنام وأصحى عشان ورايا شغل.
قعدت سنتين اشتغل وما فيش حاجة بتتعرض أبدا وجالى زى اكتئاب والناس بتبعتلى أنتى بتمثلى لنفسك والموضوع كان بجد صعب جدا عليا.
حاسة انى عاوز اعمل فرح تانى لأننا حضرنا للفرح بسرعة جدا وما عملتش الحاجات اللى كنت عاوزاها بالظبط.
بحب مسلسل "مكتوب عليا" جدًا وكنت بقولهم أنا جاية أتعالج عندكم.
 أكرم حسني مش محتاجة أقول عليه إن دمه خفيف وهو بيحب المزيكا كمان.
 كنت بضحك في كل مشاهد مكتوب عليا وكان أكتر مشهد ما عرفتش أمسك نفسى من الضحك هي لما بتكلم في التليفون وبقول جوزى جه أكرم بيضحك جدا وآيتن كمان وكنت بضحك زى الأطفال لحد ما بطنى توجعنى.
الواحد لما بيعمل حاجة من قلبه ما ينفعش بعد كل ده الناس ما تبقاش حاسة كنت حاسة أن مكتوب عليا ده البيت وكنت قلقانة جدا أنى أروح لوكيشن تانى.
كنت قلقانة ومتخوفة من المشاركة في مسلسل الكبير الجزء السادس باعتبار أني فنانة مش كوميدية.
وجدت أجواء جيدة للغاية في مسلسل "الكبير أوي" وأحمد مكي فنان خطير.
كنت متابعة المسلسل من الجزء الأول واستمعت كتير بالعمل.
مشاركة الفنانة رحمة أحمد في المسلسل كان أفضل حاجة في رمضان لان دمها خفيف وتلقائية وتحس انها صحبتك من زمان.
ممكن اتفرج 4 ساعات متواصلة على مسلسل الكبير.
بعشق المطبخ واللي عنده نفس حلو مش شرط يتقن طبخة أو أكلة معينة الموضوع له علاقة بالنفس.
اللي مش بيعرف يطبخ بيطبخ حاجة معينة فقط لكن الي بيحب المطبخ أكله وجودته بيعتمد على النفس ورغم أني بتفرج على برامج أكل وطبيخ لكن عمري ماخدت الوصفات كما هي  لازم أحط التاتش بتاعي.
لا اتأثر بالشائعات اللي بتظهر عني أنا وزوجي موضوع الشائعات بقى يضحكني خليهم يقولوا أحسن ما يفتكروا إننا كويسين قوي ويحسدونا.
ممكن أمسك تليفون أحمد لكن قليل وعندي الباسوورد، مش عشان حاجة هو مش بيغيره ومعندوش حاجة يخبيها.
أحمد بيغير عليا في حدود الطبيعي ومش بيقولي ستو أنا رغم إن الناس كلها بتقولي كده.
بفطر أحمد وبغديه وبعشيه وقبل ما اروح التصوير لازم أكون مطمنه أن عنده فطار وغدا وأكل  لو ماعملتش كده بحس بالذنب.
خطوطي الحمراء في التمثيل أساسها وجودي في مجتمع مصري وأتخيل الجمهور الذي يشاهد الفنان في التليفزيون ويعتبره قدوة.
أتمنى أكون من الناس اللي الأهالي بيشجعوا أولادهم يقلدوهم، مش عايزة أعمل حاجة تضايقهم أو مش شبه أطفالهم.
99% من صور إنستجرام مش حقيقية وكله فوتوشوب وفلتر ورغم ذلك انا بالنسبة لي مش مهم الشكل ولا الرشاقة  ولا غيره أهم شيء يبقى الانسان مبسوط من جواه.
طلعت مع هالة سرحان وانا عمرى 3 سنين، وأول فيديو كليب 4 سنين ونصف وكنت فاهمة انا بقول ايه.
طول عمرى بنت أبويا انا اصغر أخواتى، وأى مشكلة ،نا واخدة صف بابا، وحتى لو غلطان، محدش يزعله، لكن لما اتجوزت بدات أفهم قد أيه الست بتتعب، وماكنتش شايفة تعب الست غير لما اتجوزت وبقيت قريبة جدا من ماما.