تصدرت الفنانة وفاء عامر مؤشرات بحث جوجل خلال الساعات الماضية، وذلك بعدما حلت ضيفة على برنامج "كلمة أخيرة"، أمس الثلاثاء، مع الإعلامية لميس الحديد، على فضائية "on".

ونرصد أبرز تصريحاتها..
أنا بنتمي لأسرة عادية وبمارس حياتي ببساطة بعيدا عن الأضواء.
إحنا عيلة عادية بناكل ونشرب زي الناس عادي وبنقعد في البلكونة، بنتصور وإحنا مش حاطين ميكاب، وممكن ناكل فول وطعمية زي الناس العاديين، عادي على فكرة.
إحنا والإعلاميين بيطلع علينا شائعات كتير، إننا بناكل الجنيهات الدهب ونحلي بحاجات كده، والكلام ده مش حقيقي.
حكم الناس عليا ميهمنيش، أصل مش هيبطلوا يرغوا مش هيبطلوا يتكلموا ليوم الدين، أنا في حالي، وبخاف من ربنا، طول ما أنا صح هرفع راسي.. يا فاحت يا نازل.. يا باني يا طالع.
أنا بروح لدكتورة نفسية، وأنا أعتبرها صديقة، وبروحلها ساعات البيت، وبتساعديني جدا إني أعدي مراحل في حياتي.
مشاكل الشغل بتأثر على حياتي، أنا مرة لعبت دور واحدة فقيرة واتغنت، ماما لحد دلوقتي بتقولي أني بعمل بسبب الدور حركة غريبة، كنت بقعد أفرك الفلوس وأنا بعدها، لحد دلوقتي أنا بعمل كده، وكمان العصبية الزايدة والصوت العالي وغيرها.
شاركت فى رمضان فى 3 مسلسلات وهى "جزيرة غمام" و"وراجعين يا هوى" و"بيت الشدة" وكان الموضوع صعب.
كنت في رمضان ببقى متواجدة أكتر مع الأهل والأقارب لكن في رمضان اللي فات حتى لو كنت بببقى موجودة في البيت ببقى منعزلة وتفكيري فقط في الشخصية التي أقوم بدورها.
شخصية "يسرية" في مسلسل راجعين يا هوى مشاعري في مشهد صدمتي حسيت في مشهد علمي بجواز زوجي الراحل من أخرى لقيت نار طالعة من جسمي، واحد عاش معايا 27 سنة وفجأة بيقولولها إنه كان متجوز عليها، نار وصواريخ بتطلع، قولتلهم محدش يحط إيده عليّا.
لو جوزي اتجوز عليا في الحقيقة هبقى أنا السبب وهتبقى هي الغلبانة واضحك عليها.. أصل أنا ست بيت وممثلة كويسة وبحب شغلي وبيتي ومخلصة لأسرتي بالكامل.. يتجوز ليه؟ ناقصه إيه؟ جوزي لأ، لا يمكن.
ببقى متطمنة مع المخرج محمد سلامة وأنا بشوفه وبشوف رد فعله في أي مشهد.. شاب مبدع، وهو كان الداعم الأول لشخصية يسرية في مسلسل "راجعين يا هوى" عشان تخرج بهذا الشكل.
محمد سلامة كان بيضيف لي بعض التفاصيل في المسلسل، هو دمه خفيف فكان بيضيف لي حاجات في الشخصية.. ولو مكنش معايا مخرج يقود الحكاية مكنش هيطلع كويس.
خالد النبوي مكنش مفاجأة بالنسبالي لأنه كان زميلي في المعهد، وعلاقة النجم وابنه وتقارب السن بينهما ساعده في المسلسل.
خالد النبوي لا يتدخل في أي شيء خاص بالتصوير، كان بيبقى واقف زيه زينا مع إنه بطل الموضوع اللي متقاس على بليغ أبو الهنا، وبيسمع كلام المخرج ومواعيده منضبطة.
دوري في مسلسل راجعين يا هوى وجزيرة غمام رغم صعوبتيهما في موسم واحد لكن ردود الأفعال من قبل الجماهير كانت رائعة وأسعدتني ورأي النقاد جعلني أشعر بحالة حلوة.
وأنا بقرأ شخصية "هلالة" في مسلسل "جزيرة غمام" انتابني شعور غريب جدا، وحسيت إني هبقى بخون المهنة اللي بحبها لو أحاسيسي الشخصية دي موصلتش للناس بالمظبوط، وغرت عليها إن حك تاني ممكن يعملها، وحسيت هتبقى خيانة لو أنا معملتهاش بالمشاعر اللي وصلتني من المؤلف والمخرج.