شن عدد من رواد مواقع التواصل الاجتماعي هجومًا على المخرج مجدي الهواري، بسبب منشور كتبه عن لاعب المنتخب المصري ونادي ليفربول محمد صلاح.
 
وكتب الهواري، عبر حسابه على "الفيس بوك"، "أنت في خطر، لو الجمهور اللي عملك أغاني باسمك قلب الطاولة عليك هيرموك بالبيض.. هيروح منك كل حاجة دوري وأبطال أوروبا حتى لقب الهداف" .
وتابع "أنت حولت الدوري الإنجليزي إلى بورصة مش كورة! وده في صالح المنافسين. احسم وخذ قرارك وبلاش هيصة كتير كده! مفيش حد من أساطير الكورة في العالم فضل كل ده هري في المفاوضات علشان ياخد قرار! امشي / اقعد اعمل اللي انت شايفه. بس خد قرار، بلاش تحول تاريخك إلى صفقة ممكن تكسب وممكن تخسر، بلاش إللي حواليك يخلوك محدث نعمة، لو انت نجم عالمي، احنا بنشجع كورة عالمية قبل ما انت تتولد".

وتسبب منشور الهواري في إثارة جدلًا كبيرًا والهجوم عليه حيث كتب الدكتور جمال شعبان: "السيد مجدي الهواري يا ريت تخلي نصايحك المحبطة لنفسك لسببين، لأن دا مش مجالك والسبب التاني إن محمد صلاح مش محتاج نصايحك لانه عارف سكته كويس وهو عصامي نجح بدون افتكاسات خبراء الشعب المصري العظيم".

وقال أحد رواد "الفيس بوك"، "إلي المخرج مجدي الهواري بص انا هاقولك حاجه واحده، انت الكلام الوحيد اللي ينفع تجيب فيه سيرة محمد صلاح انك تتشرف وانت بتحكي لولادك أو احفادك انك عشت تاريخ محمد صلاح الكروى ...غير كده  ماتتكلمش تاني وامسح الهرى اللي انت كاتبه ده، واللى ينصح حد ينصحه باحترام.....عشان ده محمد صلاح عارف يعني ايه محمد صلاح".

وأضاف آخر: "المخرج المحترم مجدي الهواري اللي أخر و أقصى نجاحاته في مجال عمله كمخرج فيلم عيال حبيبه سنه ٢٠٠٦ و خليج نعمه في ٢٠٠٨، بيتكلم على فخر العرب محمد صلاح  أفضل لاعب في تاريخ العرب اللي واخد دوري انجليزي و سوبر سويسري و دوري ابطال اوروبا و الدوري الاوروبي و كاس العالم للأندية و كاس الرابطة و احسن لاعب في افريقيا و أحسن لاعب في الدوري الانجليزي مرتين و هداف الدوري الانجليزي و واخد الحذاء الذهبي في انجلترا و من اغلى ٥ لاعبين في العالم و ضمن اكتر ١٠٠ شخصية تأثيراً في العالم".

وبعد الهجوم الذي تعرض له أوضح الهواري، في منشور جديد أسباب هجومه على صلاح، قائلًا: «المفروض أن معروف قد ايه انا بحب محمد صلاح مش محتاج اقول ده! لأني بشجع النادي اللي بيلعب فيه بس علشانه، وقبل كده كنت بشجع روما وقبلها تشلسي بردو علشانه، وحاطط صورته فوق سرير بطل مسلسلي طول الـ30 حلقة علشان يبقي قدوة لكل جيل والشباب اللي بيشوفوا المسلسل ومنهم ولادي، وأنا واحد من الناس إلى شايف أنه مش واخد حقه وقولت ده كتير! سواء في فرصة الكورة الذهبية ولا حتي في مرتبه اللي بيخده حاليا».

وأضاف :«بس رأي مش مهم جنب المعاير العالمية لفرصة الاتنين، بس جات الفرصة في العروض اللي بتتعرض عليه في نوادي تانية بالرقم اللي هو عايزه ويمكن اكتر سواء في باريس سان جيرمان أو الريال وهو عارف أن ليفربول مش يدفعوا الرقم ده لحسابات كتيرة.. واكتر رقم هيدفعوه هو الـ 400 الف، وانا كتبت قبل كده اوعي تمشي ياصلاح من نادي عملك نشيد لمشكلة مش هنا، ولا المشكلة في الانتقال ..المشكلة في الحسم! في القرار علشان صلاح يركز في الكورة.. والله ده كان قصدي، المشكلة في سبب كتابة البوست الانفعالي جدا».

وتابع :«ععلشان مصلحته في اللي كتبته!! المشكلة أن ابننا صلاح تركيزه في المباريات بيقل لما يكون في حاجة تانية شغلاه ومحدش ينكر ده! لدرجةًان الخصم بقي يلعب على ده وواضح أن مدير اعماله مش باعد عنه كل كلام المفاوضات ومخليه بيفكر طول الوقت معاه.. لازم يشتغل على نفسه في الموضوع ده زي ماشتغل على نفسه في حاجات كتيرة وبقي قدها واتخلص منها!! زي اتقان اللغة وتحديات كتيرة جدًا وتدريباته المستمرة على رفع كفاءة الاداء، بعدين مع كارثة كمان خروجنا من كاس العالم اللي لحد دلوقتي مأثرة عليه واحساسه بالمسؤلية امام الشعب المصري كله. مش بس جمهور الكورة اللي احنا نفسنا واضح نسيناها وهو الوحيد اللي لسه متأثر بيها مع الفرصة الضايعة في الكورة الذهبية تاني لانه معملش حاجة لمنتخب بلده. واللي مخليه مش بينام بسببها».

وأكمل :«لله يكون في عونه الصراحة احلام كتير بيفكر فيها وافكار كتيرة بترن جواه ومخلياه مش في الفورمة بقاله شوية حلوين ..هو انتم كمان مش معايا انه من ساعة مارجع من أفريقيا وهو مش تمام!! ولا مش متابعين الفرص الكتير الضائعة منه اليومين دول ولا كلوب لمًا قال صلاح بنعالجه بعد رجوعه ..قولوا كلمة حق بقي لصالحه بس اليومين دول يومين حسم الالقاب ياابو صلاح مفيش دلع دوري بعد ماتش تعادل توتنهام ،وابطال اوروبا وماتش الريال والثار القديم.. ولقب الهداف اللي سون قرب منه بعشرين جون وتركيزك في الانتقال والمفاوضات.. علشان كده بقولك انت في خطر ركز، واعتقد أن كلامي كده وضح ياجماعة اني خايف على صلاح وده سبب في انفعالي لانه الحاجة الوحيدة الحلوة اللي حيلتنا ولا ايه انا عايزه يركز في الكورة في الملعب لانه ده هو اللي هيجيبله ويجيب لنا كل الخير مساء الخير ياصلاح وزي ماتريكه بيقوله ركز ياصلاح اشوفكم بعد ماتش الريال ميارة الحسم اتمني. عودة صلاح بكاس إبطال اوروب يارب يبقي كلامي حماسي للفرعون الصغير فخر قلبنا».