أثارت البلوجر أحلام عادل جدلًا على مواقع التواصل الاجتماعي بعد إعلانها انفصالها عن زوجها مصمم الأزياء أحمد العجمي، بعد شهرين من زواجهما.

وقالت أحلام في فيديو نشرته عبر حسابها على "إنستجرام"، "أنا رجعت من العمرة مضروبة ومطلقة عشان جبت مصليات لزمايلي الولاد والبنات، ملحوظة كانت مصلية مش ازازة خمرة".
وتابعت: "أنا حالتي النفسية دلوقتي سيئة جدًا، وحسبي الله ونعمة الوكيل في أي حد فرحان أو شمتان فيا، بكرة بإذن الرحمن الساعة 10 وشوية هنتقابل سوا، ولحد ما بكرة ييجي أدعولي أبقى كويسة وربنا يخلصنا منها على خير".
وقامت أحلام بحذف كافة الصور التي جمعتها مع زوجها السابق بينما مازال زوجها محتفظًا بالصور.

وقال زوجها في مقطع فيديو عبر حسابه على "إنستجرام"، بعد نشرها فيديو بتفاصيل طلاقهما، "أنا فعلا شديتها وزقتها وده مكنش المفروض يحصل، ولما رجعنا من العمرة صالحتها وبقينا كويسين، بعدين حصل خلاف تاني وزعلت منى وافتكرت كل اللى كنت بعمله، اتمنى متزعلش منى والدنيا تروق وأدعولنا الدنيا تروق وربنا يصلح الحال"
وأضاف: "سنة أولى جواز بيبقى فيها شد، وعيلتين بيتعرفوا على بعض وبنطبع على طباع بعض، وربنا ييسر الدنيا وهنروح لحد متخصص بيفهم في الكلام ده ونعرف ازاي نتعامل ونتفاهم مع بعض، كل اللى محتاجه منكوا انكوا تدعولنا ربنا يهدينا".

وعلق رواد مواقع التواصل الاجتماعي على خبر طلاق البلوجر أحلام حيث كتبت إحدى الفتيات: "زعلانة قوى عليها، دى احلام عادل البلوجر اطلقت دلوقتي بعد فرح اتكلف ملايين وفساتين وميكب وشهر عسل وفيديوهات كتير حلوة ولذيذة، احلام بعد خطوبتها التانيه طلعت وقالت الموڤ اون بيجي في ربع ساعة طالما عريس حلو وقمور زى احمد كدا، ودا يعلمك انك متسمعيش كلام اي بلوجر تاني ومتسمعيش لأي حد اصلا أو اي كلمة تانيه دى فرصه ومتتضيعهاش هي مش خطوبه وجوازة والسلام دى حياه تانيه كاملة بتتبني من اول وجديد لازم تحطي أساسات العلاقه صح، لا حلاوته ولا جماله ولا فلوسه اللي هتخليكي تكملي وتنجح جوازكم فكروا بمخكم الاول وأعرفو انتو عايزين ايه وايه الهدف ف الجواز اصلا، عشان الموڤ اون اللي بيجي في ربع ساعة بيضيع بردو ف ربع ساعه بس ساعتها هيضيع حاجات كتير اوى معاه".
وتابعت: "مش تجربه احلام بس اللي فشلت دلوقتي كله اسهل حاجه عنده الطلاق وكلنا بنشوف اللي بيحصل دلوقتي مفيش خير ف حد ومتديش الثقه الكامله ف حد".
يذكر أن البلوجر أحلام تزوجت من مصمم الأزياء أحمد العجمي في 10 مارس من العام الجاري.