تحدث الرئيس عبد الفتاح السيسي، اليوم الأربعاء، خلال حضوره احتفالية بعنوان «المرأة المصرية مفتاح الحياة»، عن الأزمة الاقتصادية.

ووجه الرئيس 8 رسائل للشعب المصري خلال كلمته بالاحتفالية..
مفيش أي نقص بالوقود رغم ارتفاع أسعاره عالميا وهو متوفر بالمحطات.
كنا محتاجين نتعامل مع تحديات ومطالب الدولة، بما يتطلبه من الحلول العلمية المخططة، بما يتماشى مع دولة بها 100 مليون مواطن، ودي حاجة مش سهلة علينا، لإنها سلسلة متصلة ببعضها.
إحنا بنقول إن في مشكلة كبيرة وليها تأثيرات اقتصادية، ونتمني انتهاء هذه الازمة قريبا حتى لايقفز سعر البترول اكثر من ذلك.
وأحنا داخلين على شهر رمضان بقولكوا اعملوا اللي انتوا عايزيينه احنا عاملين حسابنا لكل حاجة، والناس هتطلع تقول على مواقع التواصل الاجتماعي الريس بيقول متاكلوش في رمضان، بس أنا بقولكم اعملوا اللي انتوا عايزينه، بس أنا لما بتعزم في رمضان بقول كفاية نوع واحد من اللحوم، وأنا بعمل كدة في بيتي.
الناس مفكرة الريس بياكل من الجنة وده لا طبعا مبيحصلش، أنا بعمل في بيتي اللي بطلبه منكم، الناس بتطلع قدام بالجهد والوعي، ولازم نراعي كل الأمور دي.
في نقاش كتير بيقول ياترى هل إحنا كان لازم نعمل اللي عملناه ده من المشروعات، هقولكم على حاجة واحدة زي مشروعات الصوامع للقمح، زادت من قدرتنا على التخزين لتصل لـ 5 مليون ونصف طن قمح، اه حطينا فلوس كتير في الموضوع، ولكن لقينا تمن كبير له، إحنا قدرنا نحافظ على هدر من محصول القمح يصل إلى 20%.
هناك 17 مليون طن قمح بيتم زراعتهم، هنقول إن المشروع سبب في الحفاظ على حوالي 2 مليون طن قمح، لما اتعمل المشروع إحنا معندناش دلوقتي مشكلة في القمح، ولا في أي سلع أساسية وعندنا حاجتنا وزيادة وده فضل ربنا علينا وفضلكم.
اللى عايز يشكرني يحافظ علي  مصر والله يعلم ما في نفسي، ومن المهم أن نحافظ على الوطن دا وعلى حياة الـ 100 مليون ونكون فى أمان وسلام ومحدش يؤذي في حالة الأزمة التي يمر بها العالم.

وشهد الرئيس عبدالفتاح السيسي، والسيدة الأولى انتصار السيسي،  احتفالية تكريم المرأة المصرية والأم المثالية، وذلك بمركز المنارة للمؤتمرات، وبحضور الدكتورة هالة السعيد، وزيرة التخطيط والتنمية الاقتصادية، والدكتورة مايا مرسي، رئيسة المجلس القومى للمرأة، ونيفين القباج، وزيرة التضامن الاجتماعى، وعدد من الوزراء والشخصيات العامة.
ويحرص الرئيس السيسي، على حضور الحفل كل عام تقديرًا لدور المرأة المصرية، وتأكيدًا من الرئيس السيسي دائمًا على احترام المرأة المصرية التى تناضل فى كل ميادين الحياة.