أثار الإعلامي عمرو أديب جدلا واسعا خلال الساعات الماضية بعد حديثه عن ارتفاع الأسعار على خلفية الحرب الروسية الأوكرانية.

وقال أديب خلال برنامجه "الحكاية"، المذاع على فضائية "إم بي سي مصر"، أمس الاثنين، "بقالي يومين تلاتة بحاول أشوف الغلاء العالمي، العالم ده بيعمل إيه؟ هو مواطن زيه زيك عنده غلاء في الغاز. هناك الناس لأن معندهاش اعتمادية أوي على الدولة فاهمين أن السوق كده كده هيتحرك".
وتابع: "ده مش وقت بيض أورجانيك، ماله البيض العادي، كله بالبسطرمة بيبقى حلو مش لازم تشتري المنتج الغالي ما دام الأرخص منه نفس الجودة".
واضاف: "أما عن أزمة العيش ليه مانرجعتش نخبز في البيوت زي ما كنا بنعمل من 100 سنة؟ في ناس في أمريكا بدأت تعمل العيش بتاعها في البيت".

واثارت تصريحات عمرو أديب غضب رواد مواقع التواصل الاجتماعي، وكانت سببا في موجة من السخرية منه والهجوم عليه.

وكتب أحد النشطاء: "معلش يا جماعة راعوا جهلي هو في بيض اورجانيك وبيض مش أورجانيك انا أخر معلوماتي عن البيض أنه أحمر و أبيض".


وتابعت أخرى: "طالع يقولنا بلاش بيض اورجانيك هو يعني ايه اورجانيك يخوانا علشان إنا جاهله ف البيض".


وأضاف ثالث: "عمرو أديب بيتكلم عن الأسعار، وبيقول للناس مش لازم ياكلوا بيض أورجانيك وياكلوه عادي، وبالبسطرمة! بغض النظر عن سعر البسطرمة أصلًا، وبغض النظر برضو عن إني ما اعرفش إيه البيض أورجانيك دا، بس هو واضح إنه بيتكلم عن التقشف وكدذا، الأستاذ عمرو لابس ساعه أوديمار بيجيه "audemars  piguet"، اللي سعرها حوالي مليون جنيه، وطالع يقنع الطبقة الكادحة بالتقشف وشد الحزام! مش لازم تاكل بيض يا سيدي كفاية اللي بنشوفه في الإعلام".


واستكملت أخرى: "حد يبلغ عمرو أديب إن البسطرمة أغلى بكتير من البيض الأورجانيك.   هو اللي مش قادر يشتري بيض أورجانيك يقدر يشتري بسطرمة؟ ،  أما موضوع نخبز في البيوت، فحتى دي رفاهية بالنسبة للفقراء الشقيانين على رزقهم طول النهار بما فيهم أم العيال اللي ما عندهاش رفاهيات لميس".