أثارت الإعلامية ياسمين عز جدلًا واسعًا على مواقع التواصل الاجتماعي، وذلك بعد تعليقها المفاجئ عن واقعة اعتداء عريس على عروسته بعد خروجها من مركز التجميل قبل حفل الزفاف، والتي انتهت بالصلح بين العروسين.

وقالت الإعلامية ياسمين عز خلال برنامجها "كلام الناس"، المُذاع على قناة "إم بي سي مصر"، "لو كل واحدة جوزها قالها كلمة أو خطبها خبطة اتطلقت، فستات مصر كلها هتقعد في بيوتها، الراجل طبعه حامي وحمش ومراته دورها إنها تحتويه، فهو هدية ربنا لكِ على الأرض، ونعمة من ربنا عليكِ، حبيه وحافظي عليه، فهذه العروسة بنت ناس وأصيلة ولمت دنيتها، ودارت على شمعتها واحتوت الموقف وجوزها ورجلها، ومش معقول هتبوظ ليلتها وفرحها وحب 13 سنة عشان موقف احنا مش عارفين تفاصيله، مش كل اللي تشوفه أو تسمعه في كاميرا فيديو اتصور في شارع أو في بيت تصدقه".

وتابعت: "هي احتوت الموقف واحتوت جوزها وراجلها، مش هتبوظ فراحها وقصة حبهم عشان فيديو مدته دقائق، أكيد عنده رصيد عند عروسته خلاها تغفرله، والمسامح كريم، سعادة المرأة في وجود الرجل في حياتها، ومن تقول من أول ضربة أو لمسة أو تكة طلقيه دي مش بتحبك، واللي بتقول لك كدة مش هتجيب لك عريس، فمش كل حاجة تحصل من الرجل نقول يلا طلقني، ويقولون "ضل رجل ولا ضل حيطة".

وأضافت: "زمان كانوا ديما بيقولي سي قبل الاسم، معناها سيدي وتاج راسي، سيقولون نرجع لعصر الجواري لأ، من ترتدي التاج هي الملكة، فأنتِ ملكته، جربي قولي له "عايز إيه يا سيدي وتاج راسي وشوفي هيعملك إيه، والله ما هيزعلك، دي روشته كدة ونصيحة، اسمعي اللي بيقول لك حافظي على بيتك مش روحي اتطلقي".

واستكملت: "أنا دائما وأبدا ضد العنف الأسري وضد ضرب المرأة، لكن أتحدث عن هذه الواقعة تحديدا، مانسخنش الدنيا ونقول للعروسة اعملي وسوي، وطالما هو راضي وأنا راضي مالك بينا يا قاضي، وضرب الحبيب زي أكل الزبيب، مش أي ضرب ولكن مش من أول تكة أمحيه له تاريخه ممكن تكون غلطة، ألم الدنيا وأقفل على بيتي، العروسة بنت أصول وبنت عيلة، والعريس أنا واثقة أنه يحبها، وطالما لم يتحدثوا في التفاصيل فهي لا تهمنا".