روى محمود عبد الرزاق شيكابالا، كابتن الفريق الأول لكرة القدم بنادي الزمالك، تفاصيل اشتباكه مع أحمد مجاهد، رئيس اتحاد كرة القدم في مباراة التتويج ببطولة الدوري.

وقال شيكابالا خلال مداخلة هاتفية ببرنامج :" الحكاية" المذاع عبر فضائية "mbc  مصر"، إن مجاهد والأمن  منعوه من الخروج لإدخال عائلات اللاعبين، إلى أرض الملعب من أجل مشاركة اللاعبين  في الاحتفال، كما تم منعي من إدخال التيشرتات الخاصة بالاحتفالية ".
 
وتابع " قلت لأحمد مجاهد أنت تريد إفساد احتفالنا بالدوري لأنك أهلاوي، ورد رئيس الاتحاد أنه لا يقصد هذا الأمر ولكنه يستهدف الحفاظ على النظام لعدم حدوث الفوضى في الاحتفال "، مستطردا :"رفض مسئولو الأمن في الملعب دخول الأتوبيس الخاص بعائلات اللاعبين للملعب، بدون أي مبرر، حاولنا التفاوض معهم من أجل إنهاء الأزمة ولكن دون أي جدوى ".
 
وواصل :"لم أتطاول ضد أي مسئول قبل مباراة، والمشادة كانت مع أحمد مجاهد لم تشهد أي لفظ خارج ".

واستطرد :"يوم الماتش وقفنا ساعه ونص برا وأهالي زيزو والجزيري والونش مدخلوش وبنت الدكتور ٩ شهور كانت بتتخنق في الباص ومحدش راضي يدخلهم ، لو حد عمل الدور ده مكنش حصلت المشكلة ووالد الونش عمره ما دخل الاستاد  وكان عاوز يفرحه واخوات اوباما كانوا جايين من اسكندريه مدخلوش ، حميد احداد خرج الدقيقه ٧٠ بلبس الكوره برا علشان يدخل زوجته الكلام ده وعبد الشافي فتحنا الحديد علشان ولاده يدخلوا مينفعش ومبيحصلش غير معانا وبعد ما الحكم صفر حسينا ان السنه الجايه هيتداس علينا وكأنهم بيقولولنا السنه الجايه مفيش دوري او اي حاجه تاني وشركه الأمن رفضت اني ادخل اجيب تيشيرتات الاحتفال بتاعه الشركه الراعيه ورفضوا دخول اللعيبه الصغيرين ، انا كابتن النادي وده دوري اني ادخل الولاد دول ، اللاعب الصغير ده لما يتصور بالدوري دي حاجه كبيره ليه ولاهله في بلده ".

وأكمل :"لما بدأ الزعيق رئيس الاتحاد نزل وقولتله انا عاوز ادخل لعيبتي قالي هما اللي رافضين قولتله انت اهلاوي ومش عاوزنا نفرح لاني اللي حصل مش منطقي ..احنا خدنا الدوري ده علشان خاطر ايمن حفني ، انا حاسس ان ربنا كرمنا بالدوري عشان خاطر ايمن حفني وزي ما جمهور الزمالك كبرنا احنا كنا عاوزين نكبر لعيبتنا ..رئيس الاتحاد برئني من غير ما اتكلم طب انت وقفتني ليه ، جمهور الزمالك رافض اني اتوقف دقيقه واحده لأنهم شايفين الظلم اللي علينا .انا دخلت اوضه اللبس واخدت الشاور بتاعي وروحت ومركبتش الاتوبيس وكنت حزين اليوم ده ويوم ماتش الانتاج وانا شايف الجمهور في جامعه الدول كان ده بالنسبالي الاحتفال".