أشاد الإعلامى عمرو أديب، بخطاب سامح شكري، وزير الخارجية،  في جلسة مجلس الأمن بشأن سد النهضة.

وقال "أديب" خلال تقديمه ببرنامج "الحكاية"، المذاع عبر فضائية" mbc مصر"، إن خطاب سامح شكري  كان قويا ومصر نجحت بنسبة 99.9% أن تنقل أزمة سد النهضة من المسرح الإفريقى إلى المسرح الدولى، مضيفا :"سامح شكرى بيقولهم أنا جاى المرة دى أقول اللى حصل، المرة الجاية محدش يقولى هو جرا ليه، وإحنا فى مصر والسودان وكمواطنين بالنسبة للقضية دى، درجة حرارتنا عالية أوى، لكن العالم درجة حرارته 30 فهرنهيت، العالم بيكلمنا كأن المشكلة دى حصلت أول امبارح، بيقولوا اتفاوضوا واتكلموا، لأ أنا جايلك لأعلى مراحل الدبلوماسية فى العالم علشان اشتكي".
وتابع :"الناس فى الدول دى مش حاسة أوى بالأزمة، مندوب أثيوبيا كان بيستعبط، بيعتذر لأعضاء المجلس وبيقولهم احنا جينا عشان متفقين، وآبى أحمد يقولك مفيش خطر على المصريين والسودانيين من الملء، طب ما تيجى نكتب، يقولك لأ، إمبارح هما بيكلموا العالم بيقولك مصر التى لا تشبع، بيوصل للعالم صورة غلط".
وأكمل أديب أنه :"بعد كام يوم، لو تم تبنى القرار التونسى، أو يطلع بيان رئاسة، فى الحالتين أن قصاد الرجوع لمفاوضات لمدة 6 أشهر، والمندوب الروسى كمان امبارح كلامه كان ينقط، بيقولك محدش يهدد، والكلام كله يكون فى إطار المفاوضات، وفى الوقت نفسه تلاقيهم قالبين الدنيا على تيجراى وأفغانستان، العالم لا يتلفت إلا للمصائب، هما مش شايفين المصيبة بتاعتنا".